कुंकवा परायास मेणाची ग बंदोबस्ती

नंद कामिनीच्या घरी चुडयान केली वस्ती ।

समोरल्या सोप्या जान पासूडी कुणायाची

सासू निजली सुनायाची ।

लेण्यामंदी लेणं, मणी डोरलं कानी फुल

लेकी बाळीचा भरतार आगाशी चंद्र डुल ।

मायालेकीचं भांडान जसी दुधाची उकळी

बया मनाची मोकळी ।

जुंदळ्या परायास काय अंबाडी लांब फोक

मायलेकींची शीन एक ।

फाटला पालव बाई निर्‍यात झाकावा

आब कंताचा राकावा ।

दुबळ्या भरताराची सेवा करीती आदरान

पाय पुसुनी पदरान ।

पाठीवैली वेणी जन म्हनीती काळा साप

माजे तू भैनाबाई माजे वानीनी रुप झाक ।

माळ्याच्या मळ्यामंदी केली नारळी भैनीभैनी

लाडका बाळराजं मंदी केवडा अवगुनी ।

गावाला गेला बाळ एक महिना तीनवार

माजा बाळराज माजा जोडीचा बिलवार ।

उगवला नारायण उगावताना लाली लाल

मावली मातूसरी राधा बाळाला पाणी घाल ।

सकाळच्या पारी आदी शेणाच्या पाया पड

सावळ्या भाऊराया मग गुरांची पेंडी फोड ।

काळ्या इठ्‌ठलाला गोरी रुक्मीणीनं कशी दिली

वीस पुतळ्याची माळ चंद्रहाराच्या खाली गेली ।

भरल्या बाजारात मायलेकींची पडली गाठ

चाटीदादा दावीतो ग रंग गुलाबी चोळी दाट ।

पहाटीच्या दळपाला न्हाई मी कुनाला हार गेली

बया माज्या गौळणीच दूध वाघिणीच पेली ।

बग्गाहाळच्या तलाव्यानं माळरानाचं झाल मळ

सांगते तुला भना सासू सुनांचं पिवळं गळ ।

पिकल पिकल जन बोलतो येशियीत

माझा बंधुजीचा तीवडा बुडाला राशीत ।

पिकल पिकल जन बोलती चावडीला

माझ्या बंधूजीची रास लागली वावडीला ।

बाळ सासर्‍याला जाती, घोडं धरील ज्याचं त्यांनी

माझ्या त्या ग तान्हीयीचं पाय झाकिलं बंधवांनी ।

बाळ सासर्‍याला जाती, घोडं लागलं वाळवंटी

माता गुजरी बोल, बया गळयाची सोड मीठी ।

बाळ सासर्‍याला जाती घोडं बुत्तीचं गेलं पुढं

बहिणा माझ्या त्या गुजरीचा जीव लागला बयाकडं ।

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel