सासर्‍याचे बोल जसे मीरचीचे घोस
जातीवंताचे लेकी पूस ।
सासर्‍याचे बोल नको सांगूस आईपाशी
तिचं मन दुखवीशी ।
सासर्‍याचे बोल जसा विषाचा तो पेला
तुझ्यासाठी मी गोड केला मायबाई ।
माझं घर थोर केर लोटता लोटना
सभा बसली ऊठेना सासूबाईंची ।
दुरुन दिसते मला वाटते माझी आई
चुलती काकूबाई येत आहे ।
माहेरी जाताना वहिनी पायांनी पाट सारी
तुझ्या राणीला गर्व भारी भाऊराया ।
माहेरी जाताना वहिनी गुजरी डोळे मोडी
तुझ्या चोळीची काय गोडी भाऊराया ।
दे रे देवा मला बापासारखा सासरा
कंठयाखाली तो दुसरा चंद्रहार ।
दे रे देवा मला आईसारखी सासूबाई
कमळी अंबाबाई पुजीयीली ।
दे रे देवा मला बहिणीसारखी नणंद
कमळी गोविंद पुजीयीला ।
दे रे देवा भावासारखा तो दीर
कमळी रघुवीर पूजीयीला ।
आई बापांच्या राज्यामधी आम्ही दुधावरच्या साई
भावाच्या राज्यामधी शिळ्या ताकाला सत्ता नाही ।
नेसी पिवळा पितांबर हाती सोन्याचा बिलवर
मैना निघाली सासरी लेक बाबांची तालीवार ।
राजहंस पाखरु पानमळ्याच्या बसतीत
सासूचा सासुरवास सोसील्यान काय होतं ।
आईबापांच्या जिवावर दुनिया भरली दिसती
कुळा तुझ्या नांव येतं सईबाई ।
वाजत गाजत चाले रस्त्यानं वरात
जन बोलती निघाली सून सत्तेच्या घरात ।
जिवाला वाटतं तुपासंगं खावी घारी
सासू माझे मालनी मला पाठवा माहेरी ।
बाळ सासर्‍याला जाते तिच्या ओटीला कोवळी पानं
संगं मुराळी पैलवान ।
बाळ सासर्‍याला जाते, आडवा लागतो बाजार
हौशा तिचा बंधु संगं खजिन्या गुजर ।
बाळ सासर्‍याला जाते तुझं सासर लांब पल्ला
फिर माघारी भेट मला ।
