पहिली माझी ओवी - धरीतरी मेघाला

जल्म दिलेल्या दोघांला !

*

तहान लागली अरण्यडोंगरांत

गंगा माझ्या ह्रुदयांत माय माझी.

*

बारीक पिठाची भाकरी चवदारु !

माझ्या माउलीची जेवतांना याद करुं !

*

माय म्हणु माय, किती सांगूं आठवणी

आई मोहाच्या मधावाणी !

*

काय सांगुं बाई ! माहेरची बढाई

माझ्या पित्यानं लावली--येशीपासून अंबराई !

*

इथून दिसतं माहेरीचं हिरवं रान

केवढं केळीबन ! उतरीतो बागवान !!

*

माझ्या माहेराची वाट टाक्या लावूनी घडली

गाडी बुक्क्याची सांडली !

*

उंच्या ओसरीला हंडया लावल्या सवाई

भावाच्या बरोबरी मायबाईचे जांवाई !

एकामागें एक येत्याल मागंपुढें

माझे ल्हाने बंधु माझ्या माउलीचे झेंडे !

सांगावा कासाराला बैस मैदानी मैदानी

बहिनी आम्ही लईजणी संगं बंधवाची राणी !

जातां माह्याराला उंच पाऊल पडे

बापजी बयाबाई गंगासागर येती पुढें !

*

पिकलं पिकलं, ऐंशीं खंडी झाली तुरी

बंधुजीची शेरी माप लाविलं दोहेरी !

*

वाटंवरचा ऊस या उसाचा धनी कोण ?

ताईत बंधुजीला, गुळ रांधाया झालं ऊन !

माळीयाच्या मळ्यांत जाईशेवंती जावाजावा

माझा भाऊराय मधीं केवडा घेतो हवा !

*

काळी चंद्रकळा पोत किती मऊ

घेणार बंधुजी व्यापारी माझा भाऊ !

*

चाटियाच्या दुकानीं उच्च मोलाची लालाई

एक्या बंधुवाचूनी भीड कुनाला घालावी !

*

सासरीचे बोल निवडुंगाचे कांटे

बंधु तुझ्यासाठीं फाटे, मन माझें !

*

शीतळ सावलीला पाखरं झालीं गोळा !

ताईत बंधुजी, माझा इसरांतीचा पानमळा !

*

मराठी माझं गांव पान्याला कशी जाऊं

सोप्या बैसले दीर भाऊ

*

हंसतां खेळतां माहेरीं गेले दीस

दळतां कांडतां सासरीं निघे कीस !

*

जीवाला माझ्या जडू जीवाला कोन होती ?

मध्यान्‌ रात्रीं बया येती हातीं अम्रताची वाटी !

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Comments
Please join our telegram group for more such stories and updates.telegram channel

Books related to ओवी गीते : ऋणानुबंध


कविता संग्रह : संजय सावळे 4
माझी कविता
कविता संग्रह : संजय सावळे
कविता संग्रह
देवी आरती संग्रह
महाराष्ट्राचे शिल्पकार
काव्य रचना
ओवी गीते : स्त्रीजीवन
ओवी गीते : इतर
मनाचे पान
श्री..ची..कविता..
Indian Agriculture
ओवी गीते : भाविकता
ओवी गीते : बंधुराय
ओवी गीते : समाजदर्शन