नाजुक रुपडा बुंद मुखीं भर मदनाची लाली । नैनांतुन मारी लटक झटक मोहनी जीवा घाली ॥धृ०॥

मागें खोपा, कुरळ केश डोइला गे भांगाचा । चालतसे चहुकडे सुगंधी सुवास अंगाचा । भवां कमानामधीं लपविला चंद्र तारकेचा । झुमकेदार नथ नाकीं, चोळीचा रंग अंजरीचा । चीचपाटी झगझगीत, हार केठा भर मोत्यांचा । बहु नाजुक सकुमार, होई जीव पाहा तल्लीन त्याचा । भली गे निपजलीस कोठुन, नटुन मारिलें इष्काखालीं ॥१॥

सुरतपाक चमकसी तरुणीपण जोम नसे टळला । तनु शुद्ध कांचनी निमोण फरमासी ढळला । झुणेवर पातळ पैठणी झोक पुढें जमला । ठमक ठुमक चालणें रंभें पैंजणीं नाद घुमला । बघुन जालों दंग गौस गौसेना यत्न खुटला । बसुन अस्कीचा तीर अंतरींचा पडदा फुटला । तुजसाठीं मी लढुन भिडुन देईन प्राण हाली ॥२॥

अंबारीचे कळस तसे छातीवर गेंद पाहतां । असे नवतीचे कोंब नाहीं पाहिले उभे राहातां । दों दिवसांचा रंग सखे मागुता नये घडतां । कोण पुसेना तुला जरा जोबन ढिले पडतां । भल्या भल्या पतिव्रता पाहिल्या परपुरुषा रमतां । समजुनी करी विलास सखे आमुसी धरिं ममत्ता । नेघे उघड मन करून दुरुन दुरुन खुणविलें आशा जालीं ॥३॥

लागे ठसका तिला गोड बोलतां उपजे माया । वीर्यताप चेतला भ्रांती पडली भुली रे माया । मुशाफरासी म्हणे तुम्ही मंचकीं या बसा या । घालुनी गळ्यासी मिठीभोग भोगिती गोष्टी छाया । केली खातरजमा व्यास देवें जसी जैमिनीया । इतरांची काय कथा नारी मोहिती भामया । बापु म्हणे दुर्जना गुरूचें नाम घाला घाली ॥४॥

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel

Books related to लावणी


लावणी