दुंदुभी दुमदुमे भारी, बिजली जशि चमके स्वारी ! ध्रु०
दुंदुभी दुमदुमे भारी
नभमंडल भरिती भेरी,
किति धुंद दिशा या चारी !
रणकंदन माजे भारी !
गडगडाट या तोफांचा,
खणखणाटही टापांचा,
ऐकुं ये मधें स्वारीचा
ध्वनि वीरां देत हुशारी
लखलखाट तल्वारींचा
चिल्खतें आणि भाल्यांचा,
तिकडील तुर्या-तोड्यांचा,
कशि बाइ मूर्ति कंसारी !
झुंजती वीर वीरांशीं,
मधिं तळपे स्वारी खाशी,
पाडीत अरींच्या राशी
खणखणा झडति तल्वारी
जळ झुलें जसें वार्यानें
तिकडील तशा शब्दानें
कशिं बाइ झुलति हीं सैन्यें !
देईल विजय मल्हारी.
हां ! दिली पाठ सेनांनी !
परि कशी स्वारि मागोनी
गंभीर धीर शब्दांनीं
अरिवर फिरवि माघारी !
हो अरिची दाणादाण,
लोटलें सैन्य मागून,
चमुशिरीं वारुवर कोण ?
तिकडीलच बाइ भरारी !
सोन्याच्या तबकामाजी
रत्नदीप उजळुनि आजी
ओवाळिन स्वारी माझी
विजयासह येतां दारीं.
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
