चौघडा झडतो,
झडतो दुमदुमुनी, धडधडे, उर हें कां म्हणुनी ?
सनइ ही घुमते,
घुमते मंजुळ ती, मला कां गमे निधनगीती ?
मधुर या गाती,
गाति वायुवरती; पिशाची क्रीडारत दिसती.
झुलति गज दारीं,
दारीं जरि डौलें गमति कां अवसेचे पुतळे ?
चमकती युवती,
युवति जशा चपला; पिळति कां माझ्या ह्रदयाला ?
उसळली दाटी,
दाटी चौकांत' मला कां भासे एकान्त ?
वधुवरां बघुनी,
बघुनि तोष सकलां; बाळ वर माझें, सुख न मला.
गाति पंक्तीत,
पंक्तिंत 'वरमाय', हा ! कुठें परि ती वर-माय ?
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
