प्रभु तुज कवणेपरि ध्याऊं ? ध्रु०
नामातीता तुजला स्वामी
संबोधूं मी कवण्या नामीं ?
किति असलों जरि सेवाकामी
केवि तुला सेवुं ? १
चिद्घन तूं, ही जड मम वाणी;
सुख तूं, ही दुःखाची खाणी;
अनंत तूं, हीं सांतचि गाणीं,
कैशी तव गाऊं ? २
रूपातीता रूपमृढ जन,
गुणातिरिक्ता गुणग्रस्त मन
केवि अचिंत्या ध्याइल चिंतुन ?
कैसा तुज लाहूं ? ३
अपार तुझें अगम्य वैभव,
हीन दीन मी मायासंभव,
कसे आळवूं नाथ, चरण तव ?
तेज कसें साहूं? ४
नामरुपाचा दृश्य पसारा
अवाढव्य हा अपार सारा !
बावरलों, किति सैरावैरा
मृगापरी धावूं ? ५
घनतिमिरीं मी बालक तान्हें
प्रकाशार्थ अति केविलवाणें
हात नाचवीं, टाहो जाणें,
केवि ह्रदय दावूं ? ६
माउलिला तुजला प्रभुराया,
चुकलों ! लागें आर्त रडाया;
लावशील का कधीं उरा या ?
कोठें तुज पाहूं ? ७
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
