आरती त्रिभुवनजनकाची,

अर्धनरनारि-नटेशाची ! ध्रु०

झळके पुरुष अर्धभागीं,

लखलखे नारी अर्धांगीं,

सीमा ऐक्याची संगीं !

कोटि रतिमदन

मनोरम वदन

लाजतिल बघुन,

खपेना आड शरीराची !

जय जय सांत-अनंतांचीं ! १

अपर्णा तुजविण नीरस ती,

पार्वती शिलाच ती नुसती !

ज्योतिविण केवळ ती दिवटी.

तूंहि तिजवीण

देह गुणहीन,

शून्य रसभिन्न !

काय गति तुइया प्रेमाची !

जय जय सांत-अनंतांची ! २

अंबिका लाभतांचि संगा

प्रसवे खळखळ भवगंगा,

अनंगहि येई मग रंगा !

सूर्य झळझळति,

चंद्र लखलखति,

उडू लुकलुकति,

रम्यता गति ही प्रेमाची !

जय जय सांत-अनंतांची ! ३

मंदिर नक्षत्रीं जडलें,

रविशशि झुंबर लोंबविले,

सीमा सौंदर्या न मिळे,

तूंच शशिसूर्य,

तूंच सौंदर्य,

मंदिरहि दिव्य,

रूपें लीला ही ज्याची,

जय जय सांत अनंताची ! ४

नीलमणिरचित तबकिं गगनीं

निरांजन रविशशि पाजळुनी

आरती करी सृष्टी-रमणी;

झांझ झंझणण,

वायु, दण्‌दणण,

नगारा गगन,

भास्कर भक्ति तुझी याची,

जय जय सांत - अनंतांची ! ५

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel