अगाध दुर्मिळ जनीं दिसे मज कांहिं तुझ्या लोचनीं ध्रु०

या डोळ्यांच्या खिडक्यांभीतरि

अफाट अनुपम दिसे माधुरी,

प्रिये जिवलगे, काळिज त्यावरि

टाकिन कुरवंडुनी. १

अथांग भरला अपार सागर,

हेलकावतो अगाध सुंदर,

नाचति रविकर जललहरींवर,

कांपे मन पाहुनी. २

अफाट निर्मल आभाळांतुनि

तारे डौलें निघति पलटणी

तालसुरावर नियमित चरणीं

जणुं तंबुर ऐकुनी. ३

मूर्तिमंत जणुं रागरागिणी

तन्मय झाल्या गोड गायनीं

नाग, हरिण, सुरतरुणि, यक्षिणी

डुलति सखे, परिसुनी. ४

मदनाचा कुणी तरुणि पाळणा

हलवी गाउनि दिव्य गायना

जादूची का ही गे रचना

कीं भासचि हा मनीं ? ५

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel