देवा! धाव धाव धाव
देवा! धाव धाव धाव
या कठिणसमयी पाव।।देवा....।।
अगणित रस्ते दिसती येथे
पंथ मजसि दाव।।देवा....।।
अपार गोंधळ बघुनी विकळ
देई चरणी ठाव।।देवा....।।
हा मज ओढी तो मज ओढी
करिती कावकाव।।देवा....।।
कुणी मज रडवी कुणी मज चढवी
म्हणू कुणास साव।।देवा....।।
घेऊनी जा मज प्रभु चरणी निज
नुरली कसली हाव।।देवा....।।
-पुणे, ऑक्टोबर १९३४
दु:ख मला जे मला ठावे
दु:ख मला जे मला ठावे
मदश्रुचा ना
अर्थ कळे त्या
आत जळून मी सदा जावे।। दु:ख....।।
‘असे भुकेला
हा कीर्तीला’
ऐकून, भरुनी मला यावे।। दु:ख....।।
‘एकांती बसे
अभिमान असे’
वदति असे ते मला चावे।। दु:ख....।।
‘या घरच्यांची
चिंता साची’
ऐकून, खेद न मनी मावे।। दु:ख....।।
नाना तर्क
काढित लोक
नयनी सदा या झरा धावे।। दु:ख....।।
तू एक मला
आधार मुला
बसून तुझ्याशी विलापावे।। दु:ख....।।
-नाशिक तुरुंग, ऑक्टोबर १९३२
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
