देह मंदिर चित्त मंदिर एक तेथे प्रार्थना
सत्य-सुंदर-मंगलाची नित्य हो आराधना ॥
दुःखितांचे दुःख जावो ही मनाची कामना
वेदना जाणावया जागवू संवेदना
दुर्बळांच्या रक्षणाला पौरुषाची साधना
सत्य-सुंदर-मंगलाचि नित्य हो आराधना ॥
जीवनी चैतन्य राहो मानसी सद्भावना
सुंदराचा वेध लागो मानवाच्या जीवना
धैर्य लाभो तेज लाभो सत्यता-संशोधना
सत्य-सुंदर-मंगलाचि नित्य हो आराधना ॥
जाळुनी वैषम्य सारे वैर सार्या वासना
मानवाच्या एकतेची मूर्त होवो कल्पना
मुक्त आम्ही फक्त मानू बंधुतेच्या बंधना
सत्य-सुंदर-मंगलाची नित्य हो आराधना ॥
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
