राना-माळात दिवाळी हसली

पानापानांत झुंबरं सजली.

पात्या गवती हिरव्या-पिवळ्या

वर-खालून चोचीत ओवल्या

सोनरंगात घरटी मढली

राना-माळात दिवाळी हसली.

शेता-भातात सुगरण गाती

आले भरुन कणसांत मोती

उभ्या वर्षाची सराई पिकली

राना-माळात दिवाळी हसली.

शेतकरी, केली अंगाची माती

कितीक पिकल्या सोन्याच्या राशी

खळ्याखळ्यांत दौलत पडली

राना-माळात दिवाळी हसली.

चिवचिव बाळे, पाहुणे आले

खाती नव्या पिकाचे दाणे ओले

खुशीखुशीत घरटी हलली

राना-माळात दिवाळी हसली.

गार हिवाळी धुके मनमानी

रुपेरी फांदयांत दिवाळीची गाणी

चारी बाजूंना गजबज झाली

राना-माळात दिवाळी हसली.

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel