हे सुंदर, किति चांदणं
अहा ! हे सुंदर किति चांदणं
निळ्या-जांभळ्या मखमालीवर
मोत्यांचं सांडणं ॥
चमचम तारे तळ्यातले
भिरभिर वारे मळ्यातले
वर्ख पांघरुन नदीत झिरमिर
लाटांचं रांगणं ॥
रेशिम शेले घनावरी
धार दुधाची वनावरी
झळकत डोलत झाडांमधुनी
चंदेरी तोरणं ॥
धरतीवरती चहूकडे
चांदफुलांची रास पडे
फुलाफुलांसम हसा सदा हे
चंद्राचं सांगणं ॥
अहा ! हे सुंदर किति चांदणं ॥
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
