उठा उठा चिऊताई

सारीकडे उजाडले

डोळे कसे मिटलेले

अजूनही अजूनही !

सोनेरी हे दूत आले

घरट्याच्या दारापाशी

डोळ्यांवर झोप कशी

अजूनही अजूनही !

लगबग पाखरे ही

गात गात गोड गाणे

टिपतात बघा दाणे

चोहीकडे चोहीकडे !

झोपलेल्या अशा तुम्ही

आणायाचे मग कोणी

बाळासाठी चारापाणी

चिमुकल्या चिमुकल्या !

बाळाचे मी घेता नाव

जागी झाली चिऊताई

उठोनिआ दूर जाई

भूर भूर भूर भूर !

गीत - कुसुमाग्रज

आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
Please join our telegram group for more such stories and updates.telegram channel