तुझ्या गळा, माझ्या गळा
गुंफू मोत्यांच्या माळा
ताई, आणखि कोणाला ?
चल रे दादा चहाटळा !
तुज कंठी, मज अंगठी !
आणखि गोफ कोणाला ?
वेड लागले दादाला !
मला कुणाचे ? ताईला !
तुज पगडी, मज चिरडी !
आणखि शेला कोणाला ?
दादा, सांगू बाबांला ?
सांग तिकडच्या स्वारीला !
खुसू खुसू, गालि हसू
वरवर अपुले रुसू रुसू
चल निघ, येथे नको बसू
घर तर माझे तसू तसू.
कशी कशी, आज अशी
गंमत ताईची खाशी !
अता कट्टी फू दादाशी
तर मग गट्टी कोणाशी ?
गीत - भा. रा. तांबे
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
