धाड् धाड् खाड् खाड्
चाले माझी रेलगाडी
झपाटयाने मागे जाती
रानेवने खेडीपाडी ॥
वेग आता मंदावला
आला डोंगराचा घाट
शीळ घुमे पहाडात
शिरे बोगदयात वाट ॥
काळोख हा चहूकडे
नका कोणी भिऊ पण
गाडी धावे धिटाईने
शांत रहा सारेजण ॥
सरे बोगदयाची वाट
गाडी उजेडात येई
दिसे दर्यांतील पुन्हा
जंगलाची हिरवाई ॥
धपाधपा चाले गाडी
रेलतळ आता आला
सिग्नलाचा लाल हात
हवे इथे थांबायाला ॥
याच गावी जायचे ना ?
गाडी लागे फलाटास
झाला नाही कोणास ना
प्रवासाचा काही त्रास ॥
सावकाश उतरावे
नका करु घाई फार
पुन्हा भेटू केव्हा तरी
नमस्कार नमस्कार ॥
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
