उठी उठी बा आत्मया । चिन्मया दत्तात्रेया ।
सोडुनिया गुणमय शय्या । जागृत हो अपसैय्या ॥ध्रु.॥
झाली बा प्रबोध पहांट विवेक हा अरुण ।
आला उजळित आशा आता उगवे चित्किरण ॥१॥
फिक्कट पडला व्यवहारेंदु वैरि निशाचर ।
कामादि हे लपले पाहुनि प्रकाश हा थोर ॥२॥
दुस्तर्कादिक दिवाभीत दडले ते ह्या वेळी ।
दुर्वृत्ती ह्या तारा गगनी मावळल्या सकाळी ॥३॥
शमादि विप्र पुढे सादर राहति सांडुनिया दर ।
उठी उठी बा तू निजरुपा दावी ह्या सादर ॥४॥
रागद्वेष मलोत्सर्गा करुनि आला पुढती ।
वासुदेवा भेट दे हा करिताहे प्रणती ॥५॥
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
