लाभ तुझ्या मैत्रीचा दोन घडी मैत्रिणी
आणि अता जन्माची जाहलीस वैरिणी !
तू होउनि हाती मम हात दिला मैत्रिचा
अवचित का झिडकारुनि टाकिलास मानिनी !
जीवनपथ होतो मी आक्रमीत एकला
अभिलाषा धरिली, तू होशिल सहचारिणी !
दाखविली बोलुनि, हा काय गुन्हा जाहला ?
काय म्हणुनि माझ्यावर कोप तुझा भामिनी !
दिव्य तुझ्या प्रतिमेचा झोत मोहवी मला
होरपळुनि तरु माझा टाकिलास दामिनी !
गे आपण जोडीने मधु गीते गायिली
चोच मारुनी उडून जाशि निघुनि पक्षिणी !
कांति तुझी, डौल तुझा, नृत्य तुझे डोलवी
जहरि डंख करुनी मज, जाशि निघुनि नागिणी !
हृदयीची दौलत मी पायी तुझ्या ओतिली
मी भणंग, मी वेडा बनलो मायाविनी !
तडफडतो दिनरजनी जखमी विहगापरी
सूड कुण्या जन्मीचा उगविलास वैरिणी !
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
