दूर दूर कोठे दूर
मंजुळ मंजुळ चाले सूर
नकळे का ये भरुन ऊर
नयनी चाले अश्रूपूर !
निळ्या क्षितिजी टेकडया निळ्या
कोणत्या स्वप्नी पेंगती खुळ्या
त्याच सुरांनी भारल्या गेल्या
भानावर ना अजून आल्या
गूढ गूढ भारी गूढ
बावरले मन, झाले मूढ
कोण करी तर हे गारुड !
कुण्या जन्मिचा उगवी सूड !
अज्ञात कोणी अद्भुत कोणी
वाजवी पावा जादूची राणी
निळ्या क्षितिजी रांगती छाया
त्याच सुरांनी भारल्या गेल्या
भूल भूल अवघी भूल
न कळे कोणाची चाहूल !
त्याच दिशेला हे पाऊल
चालू लागे हलकेफूल !
अंधार मागे अंधार पुढे
चाललो आहो आम्ही बापुडे
भेटो न भेटो जादूची राणी
ऐकत चालू अद्भुत गाणी !
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
